RBC ស្រពិចស្រពិល​នៅ​វគ្គ​ផ្ដាច់ព្រ័ត្រ

February 1, 2012

ក្រុម Red Boy Club (RBC) ដែល​ប្ដូរ​ឈ្មោះ​មក​ពី​ក្រុម TeamTono4E កំពុង​តែ​ជួប​បញ្ហា​ក្នុង​ការ​ត្រៀម​ខ្លួន​ចូលរួម​ការ​ប្រកួត​ AK វគ្គ​ផ្ដាច់ព្រ័ត្រ​នៅ​ថ្ងៃ ១៩ វិច្ឆិកា ខាង​មុខ​នេះ​នៅ​អាគារ Phnom Penh Tower។

Bovin ប្រធាន​ក្រុម RBC បាន​ឲ្យ​ដឹង​ថា​ក្រុម​របស់​ខ្លួន​កំពុង​ជួប​បញ្ហា​ ដោយ​សារ​សមាជិក​ក្នុង​ក្រុម​អត់​សូវ​បាន​ហ្វឹក​ហាត់​ជុំ​គ្នា។ “…សមាជិក​ម្នាក់ៗ​រវល់​ដក​ឃ្លា​មិន​រួច អ្នក​ខ្លះ​ជាប់​រៀន ឯ​អ្នក​ខ្លះ​ទៀត​រវល់​ធ្វើ​ការ ដូច្នេះ​មិន​ដឹង​ថា​នៅ​ពេល​ការ​ប្រកួត​មក​ដល់ លទ្ធផល​នឹង​ទៅ​ជា​យ៉ាង​ណា​នោះ​ទេ។

ទោះ​បី​យ៉ាង​ណា​ប្រធាន​ក្រុម​រូប​នេះ​សង្ឃឹម​ប្រហែល ៥០% ដែរ​ថា​ក្រុម​របស់​ខ្លួន​នឹង​អាច​បន្ត​ដំណើរ​ឆ្ពោះ​ទៅ​ការ​ប្រកួត​នៅ​ប្រទេស ​ម៉ាឡេស៊ី​នា​បំណាច់​ឆ្នាំ​នេះ។

ចំណែក​សមាជិក​ក្នុង​ក្រុម RBC តុលា នៅ​មាន​សុទិដ្ឋិនិយម​សម្រាប់​ការ​ប្រកួត​នៅ​ថ្ងៃ​ខាង​មុខ​នេះ។ សមាជិក​រូប​នេះ​បាន​ឲ្យ​ដឹង​ថា៖ “ទោះ​បី​ក្រុម​របស់​ខ្លួន​ហ្វឹក​ហាត់​អត់​សូវ​បាន​ដិតដល់​យ៉ាង​ណា ប៉ុន្តែ​សមាជិក​ក្នុង​ក្រុម​នៅ​មាន​សាមគ្គី​គ្នា​បាន​ល្អ។ ជាក់​ស្តែង​ការ​ប្រកួត​ជម្រុះ​ជុំ​ចុងក្រោយ​កាល​ថ្មីៗ​នេះ សមាជិក​ម្នាក់ៗ​បាន​បំពេញ​តួនាទី​បាន​យ៉ាង​ល្អ​ឥត​ខ្ចោះ ទោះ​បី​ហាត់​ត្រៀម​ខ្លួន​បាន​តិច​តួច។ ហើយ​ម្យ៉ាង​វិញ​ទៀត បច្ចេកទេស​ក៏​មិន​មាន​ការ​ធ្លាក់​ចុះ​អី​នោះ​ទេ”។

យ៉ាង​នេះ​ក្ដី​ Bovin គិត​ថា​ ការ​ប្រកួត​ឈ្នះ ឬ​ចាញ់​នោះ​វា​មិន​មែន​ជា​បញ្ហា​ធំ​សម្រាប់​ក្រុម​នោះ​ទេ។ “…ការ​ប្រកួត ​គ្រាន់​តែ​ជា​ការ​កម្សាន្ត​អារម្មណ៍​តែ​ប៉ុណ្ណោះ”។

Red Boy Club ឬ Team Tono4E គឺ​ជា​ក្រុម​ជើង​ឯក​ប្រចាំ​ខែ​ឧសភា ហើយ​ជា​ក្រុម​មួយ​ក្នុង​ចំណោម​ក្រុម​ខ្លាំង​ទាំង ៤ ដែល​មាន​ឈ្មោះ​ទៅ​ប្រកួត​វគ្គ​ផ្ដាច់ព្រ័ត្រ​នៅ​ថ្ងៃ ១៩ វិច្ឆិកា ខាង​មុខ​នេះ៕