AK War Journal: ៧លក្ខខណ្ឌ ស្រួល ឬ​ពិបាក?

February 1, 2012

បន្ទាប់​ពី​ដឹង​ពី​លក្ខខណ្ឌ ​ទាំង​៧ នៃ​ការ​ប្រកួត​លំដាប់​អន្តរជាតិ​នា​ ពេល​ខាង​មុខ​នេះ ក្រុម​ជើង​ខ្លាំង​ទាំង​ពីរ​ក្រុម The Hell’s Gate និង Red Boy Club កំពុង​តែ​នាំ​គ្នា​ធ្វើ​ការ​ហ្វឹក​ហាត់​បន្ថែម​ទៀត ក្នុង​ការ​ពង្រឹង​សមត្ថភាព​របស់​ខ្លួន​ និង​ក្រុម​ទាំង​មូល​ផង​ដែរ។
បន្ទាប់​ពី​​លក្ខខណ្ឌ​បាន​អនុម័ត​ជាសាកល​​រួច​មក​ ក្រុម​ទាំង​ពីរ​នេះ ខ្លះ​ពោល​ថា​ពិបាក ខ្លះ​ពោល​ថា​ស្រួល បើ​ប្រៀប​ធៀប​ជាមួយ​លក្ខខណ្ឌ​នៃ​ការ​ប្រកួត​កាល​ពី​ខែ​វិច្ឆិកា​កន្លង​ទៅ។ តើ​ចំណុច​​ទាំង​នោះ​មាន​អ្វី​ខ្លះ?

បូវីន ប្រធាន ក្រុមRBC

“វា​ពិត​ជា​ល្អ​ និង យុត្តិធម៌​ហើយ​សម្រាប់​គូ​ប្រកួត​ទាំង​សងខាង ប៉ុន្តែ​អ្វី​ដែល​ធ្វើ​អោយ​ក្រុម​ខ្ញុំ​ពិបាក​នោះ គឺ​មាន​អាវុធ​មួយ​ចំនួន​ដែល​ក្រុម​ខ្ញុំ​ធ្លាប់​ប្រើ​គេ​មិន​អនុញ្ញាត​អោយ​ ប្រើ​ក្នុង​ការ​ប្រកួត​នោះ​ទេ!” នេះ​ជា​ការ​លើក​ឡើង​របស់ បូវីន​ ​ប្រធាន​ក្រុម​ Red Boy Club (RBC) ។ បូវីន​ក៏បាន​បន្ថែម​ទៀត​ថា ខុស​ពី​លក្ខខណ្ឌ​នៅ​ស្រុក​ខ្មែរ ព្រោះ​អាច​ប្រើ​អាវុធ​តាម​ជំនាញ​របស់​ពួក​គេ តែ​ពេល​នេះ​ពួក​គេ​ត្រូវ​ចំណាយ​ពេល​ហ្វឹក​ហាត់​ពី​អាវុធ​ថ្មី​មួយ​ចំនួន​ ដែល​សមស្រប​នឹង​លក្ខខណ្ឌ​របស់​គេ ហើយ​ពួក​គេ​មិន​បោះ​បង់​ពេល​វេលា​សិក្សា​ និង​កិច្ចការ​ផ្ទះ​របស់​ខ្លួន​ ដើម្បី​ហ្វឹក​ហាត់​នោះ​ទេ គឺ​យក​តែ​ពេល​ទំនេរ​ប៉ុណ្ណោះ។

“ទោះ​បី​ជា​លក្ខន្តិកៈ​ទាំង​៧​នោះ​ច្រើន​យ៉ាង​ណា​ក៏ដោយ ក៏​ក្រុម​របស់​ខ្ញុំ​នឹង​ខិត​ខំ​ពង្រឹង​សមត្ថភាព​របស់​ក្រុម​ទាំង​មូល​អោយ​ ស្រប​ទៅ​នឹង​លក្ខខណ្ឌ​របស់​ការ​ប្រកួត​ខាង​មុខ​ដែរ”។ ប្រធាន​ក្រុម​រូប​នេះអះអាង​ដូច្នេះ។

ថាន់ណាន់ ប្រធានក្រុមThe Hell’s Gate

ចំណែក​ឯថាន់​ណាន់ ដែល​ជា​ប្រធាន​ក្រុម​ដឹក​នាំ​របស់​ក្រុម The Hell’s Gate វិញ បាន​និយាយ​ប្រាប់​ Sabay ថា ”លក្ខខណ្ឌ​នៃ​ការ​ប្រកួត​នៅ​ប្រទេស​ម៉ាឡេស៊ី គឺ​ខុស​គ្នា​ម្យ៉ាងម្នាក់​ បើ​ធៀប​នឹង​លក្ខខណ្ឌ​របស់​ប្រទេស​យើង”។ ជុំវិញ​បញ្ហា​នេះ ថាន់ណាន់ ក៏​បាន​បកស្រាយ​ថា លក្ខខណ្ឌ​ប៉ុណ្ណឹង​​មិន​អី​ទេ សំខាន់​គឺ​យើង​យល់​ពី​គោលការណ៍​នៃ​លក្ខខណ្ឌ​របស់​គេ​ច្បាស់ ហើយ​យើង​មិន​បំពាន​នោះ​គឺ​បាន​ហើយ។

ទន្ទឹម​នឹង​ការ​លើក​ឡើង​បែប​នេះ ថាន់ណាន់ ក៏​បាន​បង្កប់​នូវ​ក្ដី​បារម្ភ​មួយ​គឺ លក្ខខណ្ឌ​ច្រើន​ពេក។ “តែ​ទោះ​ជា​យ៉ាង​ណា​ក៏ដោយ វា​ហាក់​បី​ដូច​ជា​ច្រើន​បន្តិច ព្រោះ​លក្ខខណ្ឌ​កាល​ពី​ការ​ប្រកួត​កន្លង​ទៅ​នេះ​ គឺ​មាន​ភាព​ងាយ​ស្រួល​ជាង​លក្ខខណ្ឌ​របស់​ប្រទេស​ម៉ាឡេស៊ី”។ លើស​ពី​នេះ ប្រធាន​ក្រុម​មួយ​នេះ​បាន​បញ្ជាក់​ថា ក្រុម​របស់​ខ្ញុំ​ដឹង​ទឹក​ដៃ និង​យល់​ពី​លក្ខខណ្ឌ​កាន់​តែ​ច្បាស់​ ក្រោយ​ពី​ពេល​ប្រកួត​នៅ​ទឹក​ទី​មួយ ដូច្នេះ​ទឹក​ទី​ពីរ​គឺ​អាច​ប្រកួត​ដឹង​ទឹក​ដៃ​ហើយ។
លក្ខខណ្ឌ​នៃ​ការ​ប្រកួត​នៅ​លើ​ឆាក​អន្តរជាតិ​ គឺ​បង្កើត​ឡើង​ដើម្បី​អោយ​ក្រុម​ចូល​រួម​ប្រកួត​ទាំងអស់ អាច​សាក​ល្បង​សមត្ថភាព​គ្នា​ក្នុង​ការ​ប្រយុទ្ធ​គ្នា​នៅ​ក្នុង​កម្មវិធី ​ AK World Championship ដែល​មាន​ ៦ ប្រទេស​ចូល​រួម​មាន​ដូច​ជា ម៉ាឡេស៊ី (ម្ចាស់​ផ្ទះ) ថៃ ចិន ឥណ្ឌូណេស៊ី សិង្ហបុរី និង​កម្ពុជា ដែល​នឹង​ប្រារព្ធ​ឡើង​ចំនួន​ពីរ​ថ្ងៃ​ជាប់ៗ​គ្នា គឺ​ទី ១៤-១៥ មករា ២០១២៕